വരുന്നൂ വിന്‍ഡോസ് - 7
ഖലീല്‍ വെള്ളില
musthafa.chembayil@gmail.com
'വിന്‍ഡോസ് വിയന്നക്ക് വിട. വിന്‍ഡോസ് 7-ന് സ്വാഗതം'. വിന്‍ഡോസിന്റെ അടുത്ത പതിപ്പിന്റെ പരസ്യത്തിന് മൈക്രോസോഫ്റ്റ് നല്‍കുന്ന തലക്കെട്ട് മിക്കപ്പോഴും ഇങ്ങനെയാണ്. വിസ്റ്റക്ക് ശേഷമുള്ള പുതിയ ഓപറേറ്റിംഗ് സിസ്റ്റത്തിനായി അണിയറയില്‍ ഒരുക്കമാരംഭിച്ചുവെന്ന് ഇതില്‍ നിന്ന് കമ്പ്യൂട്ടര്‍ ലോകം മനസ്സിലാക്കുന്നു. ഓരോ മൂന്ന് വര്‍ഷത്തിലും വിന്‍ഡോസിന്റെ പുതിയ പതിപ്പ് പുറത്തിറക്കുക എന്നത് സോഫ്റ്റ്വെയര്‍ ഭീമമന്‍മാരായ മൈക്രോസോഫ്റ്റിന്റെ നയമായതിനാല്‍ ഇതില്‍ പൊതുവെ പുതുമയൊന്നും അവകാശപ്പെടാനില്ല.
പുതിയ വിന്‍ഡോസിനെക്കുറിച്ച് കൂടുതല്‍ വിവരമൊന്നും മൈക്രോസോഫ്റ്റ് ഇതുവരെ പുറത്ത് വിട്ടിട്ടില്ല. 2009-ലോ 2010-ലോ ആയിരിക്കും ഇത് പുറത്തിറങ്ങുക എന്നാണ് ഇപ്പോഴത്തെ പ്രതീക്ഷ. പതിവുപോലെ ഒട്ടേറെ പുതുമകളവകശപ്പെട്ടു തന്നെയായിരിക്കും ഇതിന്റെയും പുറപ്പാടെങ്കിലും ഉപയോക്താക്കള്‍ ഇതിനെ എങ്ങനെ സ്വീകരിക്കുമെന്ന് കണ്ടറിയുക തന്നെ വേണ്ടി വരും. പ്രത്യേകിച്ചും വിസ്റ്റക്ക് നേരിടേണ്ടി വന്ന ദുരന്തം മൈക്രോസോഫ്റ്റിന്റെ മുമ്പിലുണ്ട്. വിസ്റ്റയെപ്പോലെ 64 ബിറ്റ് സോഫ്റ്റ്വെയറായിത്തന്നെ അറിയപ്പെടുമെങ്കിലും 32 ബിറ്റ് കമ്പ്യൂട്ടിംഗിനെക്കൂടി പരിഗണിച്ചുകൊണ്ടായിരിക്കും ഇത് പുറത്തിറങ്ങുക. നിലവിലെ കമ്പ്യൂട്ടറുകളില്‍ ഭൂരിഭാഗവും 32 ബിറ്റ് പതിപ്പ് മാത്രമേ ഉള്‍ക്കൊള്ളൂവെന്നതാണ് ഇതിന് കാരണം. വിന്‍ഡോസ് വിസ്റ്റ പ്രശ്നക്കാരനായതും ഇവിടെയാണ്. പുതിയ ഓപറേറ്റിംഗ് സിസ്റ്റത്തില്‍ ഉപയോക്താവിന്റെ ആവശ്യമനുസരിച്ച് 32 ബിറ്റ്, 64 ബിറ്റ് എന്നിവ തിരഞ്ഞടുക്കാന്‍ സൌകര്യമുണ്ടായിരിക്കും എന്നാണറിയുന്നത്.
പുതിയ പതപ്പിന്റെ യൂസര്‍ ഇന്റര്‍ഫെയ്സിന് നല്‍കിയിരിക്കുന്ന കോഡ് നാമം Black comp എന്നാണ്്. ഇതു വരുന്നതോടെ നിലവിലെ ഇന്റര്‍ഫെയ്സ് പുര്‍ണ്ണമായും മാറാന്‍ സാധ്യതയുണ്ടത്രെ. അഥവാ പൂര്‍ണ്ണമായി മാറിയില്ലെങ്കില്‍ തന്നെ പുതിയൊരു ഇന്റര്‍ഫെയ്സ് ശൈലിക്ക് ഇത് തുടക്കമിടുമെന്ന് പറയാം. വിസ്റ്റയില്‍ പ്രവര്‍ത്തനക്ഷമതക്ക് ആക്കം കൂട്ടാനായി 'ഹൈപ്പര്‍ വിസ്സര്‍' സംവിധാനമുള്‍പ്പെടുത്തിയിരിക്കുന്നു. 'Viridian' എന്ന കോഡ് നാമത്തിലാണ് ഇതറിയപ്പെടുന്നത്. ഓപറേറ്റിംഗ് സിസ്റ്റത്തിന്റെ അടിത്തട്ട് മുതല്‍ ചേര്‍ന്നു പ്രവര്‍ത്തിക്കുന്നുവെന്നതാണ് ഇതിന്റെ സവിശേഷത. പുതിയ പതിപ്പില്‍ ഈ സംവിധാനം കൂടുതല്‍ ശക്തമായിരിക്കും. വിന്‍ഡോസില്‍ ഇതുവരെ പരിചയിച്ചുവന്ന ഏതാനും ആപ്ലിക്കേഷനുകള്‍ക്ക് മാറ്റം വരാന്‍ സാധ്യതയുണ്ട്. ഇന്റര്‍നെറ്റ് എക്സ്പ്ലോളറിന്റെ ഏറ്റവും പുതിയ പതിപ്പായ IE 9 ഇതിന്റെ കൂടെ ഉണ്ടായിരിക്കുമെന്നും പ്രതീക്ഷിക്കുന്നു. വീഡിയാ പ്ലേയറിനും മീഡിയാ സെന്ററിനും പുതിയ പതിപ്പില്‍ കൂടുതല്‍ സവിശേഷതകളുണ്ടായിരിക്കും.
നേരത്തെ ലിനക്സും പിന്നീട് മാക് ഓപറേറ്റിംഗ് സിസ്റ്റവും രംഗത്തവതരിപ്പിച്ച വെര്‍ച്ച്വല്‍ ഡെസ്ക്ടോപ് വിന്‍ഡോസിന്റെ പുതിയ പതിപ്പിലുള്‍ക്കൊള്ളിക്കുമെന്നും അറിയുന്നു. അതോടൊപ്പം സിസ്റ്റം റീ സ്റ്റോര്‍ സംവിധാനവും ശക്തമാക്കും. പരമ്പരാഗതമായി വിന്‍ഡോസില്‍ സ്ഥാനം പിടിച്ച പെയിന്റ് സോഫ്റ്റ്വെയറും പുതിയ രൂപത്തിലാണത്രെ ഇതില്‍ പ്രത്യക്ഷപ്പെടുക. വിന്‍ഡോസ് ലൈവ്, ലൈവ് ഡ്രൈവ് തുടങ്ങിയ സേവനങ്ങളും കൂടുതല്‍ മെച്ചപ്പെടുത്തുമെന്നും പ്രതീക്ഷയുണ്ട്.
*****
ബ്ലോഗ് പരിചയം
വി.കെ. ആദര്‍ശ്
www.blogbhoomi.blogspot.com
വാര്‍ത്താ ദൃശ്യങ്ങള്‍ ബ്ലോഗില്‍
വീഡിയോ ക്ലിപ്പിംഗുകള്‍ ബ്ലോഗിലെത്തുന്നത് വ്ളോഗിംഗ് (Vlog - Video Bloging) എന്ന പേരിലറിയപ്പെടുന്നു. ഗള്‍ഫ്നാടുകളില്‍ മാധ്യമ പ്രവര്‍ത്തകനായി ജോലി നോക്കുന്ന കുഴൂര്‍ വില്‍സനാണ് ഈ ഇനത്തിലുള്ള 'വാര്‍ത്തകള്‍ വായിക്കുന്നത്' എന്ന ബ്ലോഗിന്റെ ശില്പിയും അവതാരകനും. ഗൂഗിളിന്റെ തന്നെ വീഡിയോ ഷെഷയറിംഗ് സംവിധാനമായ യൂട്യൂബില്‍ ഇട്ട ദൃശ്യങ്ങളാണ് ബ്ലോഗിലെത്തിച്ചിരിക്കുന്നത്. മണലാരണ്യങ്ങളില്‍ നിന്നുള്ള ദൃശ്യങ്ങളാണ് ബ്ലോഗിലുള്ളത്. വീഡിയോ പരിപാടികള്‍ ബ്ലോഗിലെത്തുന്നതിന്റെ പ്രധാന നേട്ടം അത് കാഴ്ചക്കാര്‍ക്ക് ഇഷ്ടമുള്ള ഏത് സമയത്തും കാണാമെന്നതാണ്. ഒരു മുഴുവന്‍ സമയ വാര്‍ത്താ ചാനലിലാണ് ഈ ദൃശ്യങ്ങള്‍ കാണിക്കുന്നതെങ്കില്‍, ചാനല്‍ സംപ്രേഷണം ചെയ്യുന്ന സമയത്ത് തന്നെ കാണണം. അതേസമയം ബ്ലോഗില്‍ പോസ്റ്റ് ചെയ്ത ദൃശ്യങ്ങള്‍ ഏത് സമയത്തും കാണാമെന്നത് ഇതിന്റെ ഭാവി സാധ്യതകളിലേക്ക് വിരല്‍ ചൂണ്ടുന്നു. മൊബൈല്‍ ഫോണും ഡിജിറ്റല്‍ കാമറകളും കൂടുതല്‍ ജനകീയമാകുന്ന ഈ കാലത്ത് വീഡിയോ ബ്ലോഗുകള്‍ക്ക് ഏറെ പ്രസക്തിയുണ്ട്. ഈ വഴിയിലൂടെ ആദ്യം നടന്നവരിലൊരാള്‍ എന്ന വിശേഷണം കുഴൂര്‍ വില്‍സന്‍ അര്‍ഹിക്കുന്നു.
ബ്ലോഗിനെക്കുറിച്ചുള്ള വീഡിയോകളും ഇതില്‍ കാണാം. 'കുറുമാന്റെ കഥകള്‍' എന്ന ബ്ലോഗിനെപ്പറ്റിയുള്ള 'ബ്ലോഗ് വിളവെടുപ്പ് തുടങ്ങി' എന്ന വീഡിയോയും, ഇന്‍ഫോമാധ്യമത്തിന്റെ ഈ പംക്തിയില്‍ നേരത്തെ പരിചയപ്പെടുത്തിയ സജീവിന്റെ 'കേരള ഹഹഹ' എന്ന ബ്ലോഗിനെക്കുറിച്ചുള്ള 'ചിരി ഒരു നേരിയ വളവാണ്' എന്ന പോസ്റ്റും കാണാം. സംഗീത സംവിധായകന്‍ ദക്ഷിണ മൂര്‍ത്തിയുമായുള്ള അഭിമുഖം, വിവിധ പള്ളികളുടെ ചിത്രീകരണം എന്നിവയെല്ലാം 'വാര്‍ത്താ ദൃശ്യങ്ങള്‍' എന്ന വീഡിയേ ബ്ലോഗിനെ ദൃശ്യ സമ്പന്നമാക്കുന്നു.
ബ്ലോഗ് അഡ്രസ്സ്. http://boologapathram.blogspot.com/.
*****
വെബ് കൌതുകങ്ങള്‍
റയിസ്ല മര്‍യം
raizlamaryam@hotmail.com
കൂട്ടുകാര്‍ക്കൊരു വെബ്സൈറ്റ്
കൊച്ചു കൂട്ടുകാര്‍ക്കു വേണ്ടി മാത്രമായൂള്ള ഒരു 'അടിപൊളി' വെബ്സൈറ്റാണ് www.prongo.com. ഇതില്‍ ഒരുക്കിവെച്ചിട്ടുള്ള വിഭവങ്ങള്‍ എന്തെല്ലാമാണ്െ അറിയേണ്ടേ?
1. തമാശകള്‍ - ചിരിച്ചു മണ്ണുകപ്പിക്കുന്ന ഫലിതങ്ങള്‍.! നിങ്ങള്‍ക്കറിയാവുന്ന നേരമ്പോക്കുകള്‍ ലോകമെമ്പാടുമുള്ള കൂട്ടുകാരുമായി പങ്കുവെക്കുവാനുള്ള സംവിധാനവുമുണ്ട് കെട്ടോ.
2. കളികള്‍ - പഠനവും കളിയും ഒരുമിച്ചു നടത്താം. വായന അഭ്യസിച്ചു തുടങ്ങുന്നവര്‍ക്കും കമ്പ്യൂട്ടര്‍ മൌസ് പിടിച്ചു തുടങ്ങുന്നവര്‍ക്കും കണക്കില്‍ പിച്ചവെക്കുന്നവര്‍ക്കും പ്രത്യേകം കളികള്‍. കൂട്ടത്തില്‍ വിവിധതരം പദപ്രശ്നങ്ങളും പസിലുകളും അതുപോലുള്ള മറ്റു ഊരാക്കുടുക്കുകളും.
3. പ്രശ്നോത്തരികള്‍ - ഇവിടെ അറിവു പരിശോധിക്കാം. മനുഷ്യ ശരീരത്തെക്കുറിച്ചും ശൂന്യാകാശത്തെക്കുറിച്ചുമെല്ലാമുള്ള നിരവധി ചോദ്യങ്ങള്‍.
പ്രായത്തിന്റെ അടിസ്ഥാനത്തില്‍ മൂന്ന് മുതല്‍ ആറ് വരെ, ആറ് മുതല്‍ ഒമ്പത് വരെ, ഒമ്പത് മുതല്‍ പന്ത്രണ്ട് വരെ എന്നിങ്ങനെ മൂന്ന് വിഭാഗമായി മണിക്കൂറുകള്‍ നീണ്ടു നില്‍ക്കുന്ന വിജ്ഞാന വിരുന്നും നേരമ്പോക്കുകളുമാണ് ഈ സൈറ്റില്‍ കൂട്ടുകാരെ കാത്തിരിക്കുന്നത്. ഇ^കാര്‍ഡുകള്‍, വാള്‍ പേപ്പറുകള്‍, സ്ക്രീന്‍ സേവറുകള്‍ തുടങ്ങിയ വേറെയും
വിഭവങ്ങള്‍.
*****
ഇന്‍ഫോ ക്വിസ്
ജലീല്‍ വൈരങ്കോട്
tvjaleel@gmail.com
1. നിലവിലെ ഹാര്‍ഡ് ഡിസ്ക്കിന് പകരക്കാരനായേക്കുമെന്ന് പ്രതീക്ഷിക്കുന്ന ഐ.ബി.എം കോര്‍പറേഷന്റെ റെയ്സ്ട്രാക്ക് മെമ്മറി കണ്ടെത്തിയതാര്?
2. ഉബുണ്ടു ലിനക്സ് ഓപറേറ്റിംഗ് സിസ്റ്റത്തിന്റെ ഏറ്റവും പുതിയ പതിപ്പ് (2008)?
3. OOXML പൂര്‍ണ്ണ രൂപം?
4. HSPA എന്താണ്?
5. ഓണ്‍ലൈന്‍ നിരീക്ഷണം ഏര്‍പ്പെടുത്തിയ കേരളത്തിലെ ആദ്യത്തെ ചെക്ക് പോസ്റ്റ്?
6. സൈബര്‍ കുറ്റകൃത്യങ്ങള്‍ തടയാനും പ്രതിരോധ മാര്‍ഗ്ഗങ്ങള്‍ സ്വീകരിക്കാനുമുള്ള സംസ്ഥാന സര്‍ക്കാരിന്റെ വെബ്പോര്‍ട്ടല്‍?
7. ബ്ലോഗിന്റെ പൂര്‍ണ്ണ രൂപമായ വെബ് ലോഗ് എന്ന പദം ആദ്യമായി ഉപയോഗിച്ചതാര്?
8. 3D ഒബ്ജക്റ്റുകള്‍ നിര്‍മ്മിക്കുന്നതിന് ഉപയോഗിക്കുന്ന മുഖ്യ സോഫ്റ്റ്വെയര്‍?
9. ഈ വര്‍ഷാവസാനം പുറത്തിറങ്ങുമെന്ന് പ്രതീക്ഷിക്കുന്ന ഗൂഗിള്‍ഫോണിന്റെ നിര്‍മ്മാണം ഏറ്റെടുത്തിരിക്കുന്നത് ഏത് കമ്പനിയാണ്?
10. മലയാളം കമ്പ്യൂട്ടിംഗിനെ പ്രോല്‍സാഹിപ്പിക്കാനായി കേരളാ സര്‍ക്കാര്‍ സ്ഥാപിച്ച വെബ്സൈറ്റ്?
ഉത്തരം
1. ഐ.ബി.എമ്മിന്റെ സാന്‍ജോസിലുള്ള ആന്‍മന്‍ഡാര്‍ റിസര്‍ച്ച് സെന്ററിലെ ഡോ. സ്റ്റുവെര്‍ട്ട് പാര്‍ക്കിന്‍
2. ഹാര്‍ഡിഹെറോണ്‍
3. ഓഫീസ് ഓപണ്‍ എക്സ്റ്റന്‍സിബിള്‍ മാര്‍ക്ക്അപ് ലാംഗ്വേജ്
4. വയര്‍ലെസ് രംഗത്തെ മൂന്നാം തലമുറ സാങ്കേതികവിദ്യയായ വൈഡ്ബാന്‍ഡ് കോഡ് ഡിവിഷന്‍ മള്‍ട്ടിപ്പിള്‍ ആക്സസിന്റെ (WCDMA) പരിഷ്ക്കരിച്ച പതിപ്പ്.
5. വാളയാര്‍
6. www.cyberkeralam/in
7. ജോണ്‍ സാര്‍ജര്‍
8. ബ്ലെന്‍ഡര്‍
9. തായ്വാനിലെ മൊബൈല്‍ ഹാന്‍ഡ്സെറ്റ് നിര്‍മ്മാതാക്കളായ എച്ച്.ടി.സി.
10. http://malayalam.kerala.gov.in
*****
വാപ് സൈറ്റുകള്‍
അബ്ദുല്‍ മുനീര്‍ എസ്.
amscalicut@gmail.com
മൊബൈല്‍ ഫോണുപയോഗിച്ച് ആക്സസ് ചെയ്യാനും സന്ദര്‍ശിക്കാനും സാധിക്കുന്ന വെബ്സൈറ്റുകളാണ് 'വാപ് സൈറ്റു'കള്‍. വിവിധ ആവശ്യങ്ങള്‍ക്കുള്ള സോഫ്റ്റ്വെയറുകള്‍ക്ക് പുറമെ വാള്‍പേപ്പറും ഗെയിമുകളും മറ്റും ഈ സൈറ്റുകളില്‍ നിന്ന് ഡൌണ്‍ലോഡ് ചെയ്യാവുന്നതാണ്. എച്ച്.ടി.എം.എല്‍ അധിഷ്ഠിതമായ വെബ്സൈറ്റുകളും ഇക്കൂട്ടത്തിലുണ്ട്. ഇവ സന്ദര്‍ശിക്കാനായി Opera Mini, Microsoft deepfish തുടങ്ങിയ വെബ് ബ്രൌസറുകള്‍ മൊബൈല്‍ ഫോണില്‍ ഡൌണ്‍ ലോഡ് ചെയ്യേണ്ടതുണ്ട്. ഗൂഗിളും യാഹുവുമെല്ലാം ഇപ്പോള്‍ മൊബൈല്‍ ഫോണിലെത്തിയിരിക്കുന്നു. ദിനപത്രങ്ങളും മാഗസിനുകളും മൊബൈല്‍ ഫോണിലേക്ക് കടക്കുകയാണ്. wap.google.com, wap.yahoo.com wap.rediff.com തുടങ്ങിയവ പ്രമുഖ വാപ് ഡയറക്ടറികളായി അറിയപ്പെടുന്നു. netjar.com, tagtag.com തുടങ്ങിയ സൈറ്റുകള്‍ ഫ്രീ ഡൌണ്‍ലോഡിംഗ് സൌകര്യമൊരുക്കുന്നു. കമ്പ്യൂട്ടറുപയോഗിച്ച് ഈ സൈറ്റുകള്‍ സന്ദര്‍ശിച്ച് മൊബൈല്‍ ഫോണിനാവശ്യമായ സോഫ്റ്റ്വെയറുകള്‍ ലഭ്യമാക്കാനും സൌകര്യമുണ്ട്. mailmate.co.za, mobiplanet.in, surfwap.com, smsgupshup.com, wapain.net തുടങ്ങിയവ വ്യത്യസ്ത രീതികളിലെ സേവനങ്ങള്‍ കാഴ്ചവെക്കുന്ന വാപ് സൈറ്റുകളാണ്.
===========================
No comments:
Post a Comment